Польшанын тышкы иштер министри Радослав Сикорский дүйшөмбү күнү, Орусиянын армиясы Украинада согушуп жатканда НАТОго ири чабуул жасоого күчү жетпей турганын айтты.
TVP Info коомдук телерадиокомпаниясына берген маегинде Сикорский өткөн аптада Варшавага ар кандай булактардан Орусиянын "быйыл чоң бир нерсеге даярданып жатканын" көрсөткөн маалымат келип түшкөнү тууралуу эскертүүсүн тактады.
Москванын пландарынын мүнөзү тууралуу суралганда Сикорский: "Албетте, муну бир гана Путин билет; бирок биз даяр болушубуз керек, өзүбүздү манипуляциялоого жол бербешибиз керек жана союздаш катары ар кандай провокацияга дароо жооп кайтара алышыбыз үчүн сергек болушубуз керек", - деп жооп берди.
Сикорский: "Орусиянын НАТОго ири чабуул жасоого күчү жок", - деп билдирди жана учурда бардык орусиялык күчтөр Украинада согушуп жатканын кошумчалады.
НАТОнун өз ара коргонуу жобосунун 5-беренеси колдонулабы же жокпу деген темада европалык жана америкалык мүчөлөрдү бөлүп-жарган окуя Кремлге пайда алып келерин да кошумчалаган Сикорский "Орусия буга чейин жасап жаткандан да агрессивдүү иш-аракет кыла алат" деди.
Өткөн аптада Польша органдары Польшанын чек арасына жакын жердеги Украинанын батыш аймактарын бутага алган Орусиянын дрон жана ракеталык чабуулдарынан кийин Грубешов жана Дорохуск чек ара бекеттерин убактылуу эвакуациялаган.
Мындан тышкары, орусиялык Ми-8 тик учагы Калининграддан Польшанын аба мейкиндигине киргенден кийин поляк согуштук учактары абага көтөрүлүп, абадан коргонуу системалары даярдыкка келтирилген.
Батыш өкмөттөрү Москваны НАТО жана Европа Биримдигинин өлкөлөрүнө каршы гибриддик согуштук өнөктүктүн алкагында саботаж актыларын жасап, аба мейкиндигин бузууда деп айыпташты.
