АКШнын президенти Дональд Трамп дүйшөмбү күнү, Израилдин курчоодогу Газага каршы согушу расмий түрдө аяктаганын кабарлады. Бул тууралуу ал палестиналык каршылык көрсөтүүчү ХАМАС тобу жээк аймагында кармалып турган 20 израилдик туткунду бошоткондон бир нече мүнөт өткөндөн кийин айтты.
Бир журналисттин согуш бүттүбү деген суроосуна Трамп кыскача "Ооба" деп жооп берип, Израилдин парламенти Кнессетте депутаттарга кайрылуу жасоого даярданып жатканын билдирди.
Анадолу агенттигинин кабарчысынын айтымында, ХАМАСтын аскердик канаты “ал-Кассам бригадалары” дүйшөмбү күнү 20 израилдик тутукундун бошотулушу аяктаганын жарыялады.
Туткундар Газада эки топ түрүндө Кызыл Крест уюмуна өткөрүлүп берилди.
Трамптын Израиль менен ХАМАСтын ортосундагы 20 пункттан турган ок атышпоо келишимине ылайык, израилдик туткундардын бошотулушуна жооп катары 1,968 палестиналык туткун, анын ичинде өмүр бою эркинен ажыратылган 250 адам да бошотулмакчы.
Туткундар медиа кеңсесинин маалыматына караганда, палестиналык туткундарды ташыган автобустар дүйшөмбү күнү Израилдин абактарынан Газага жана басып алынган Батыш Шериага жөнөп кетти.
