Кремль дүйшөмбү күнү Россиянын президенти Владимир Путиндин Украинадагы кагылышуу аймагына барганын жарыялады.

Кремлдин маалыматы боюнча, Путинге Башкы штабдын башчысы Валерий Герасимов, ошондой эле Борбордук топтун командири Валерий Солодчук жана “Восток” тобунун командири Андрей Иванаев брифинг беришти.

Путинге фронттогу кырдаал тууралуу маалымат берилди. Россиянын аскердик жетекчилеринин айтымында, Донецк облусундагы Покровск жана Харьков облусундагы Волчанск шаарлары кайрадан Россиянын көзөмөлүнө өттү.

Путин командирлерге жана аскерлерге ыраазычылык билдирип, Покровск аймагында жетишилген ийгиликтердин маанисин баса белгилеп: "Бул бизге атайын аскердик операциянын башында коюлган бардык негизги максаттарга ырааттуу түрдө жетүүгө мүмкүндүк берет",- деди.

Герасимов украин күчтөрүнүн Купянск жана Покровск фронтторундагы курчоодон өз аскерлерин чыгарууга аракет кылып жатканын жана башка фронттордо каршы чабуулдарды баштаганын билдирди.

Аймактык жеңиштерге жетишилди деп болжолдонууда

“Восток” тобунун командири Иванаев Запорожье жана Днепропетровск аймактарында жылыштардын болуп жатканын айтты.

Иванаев орус күчтөрүнүн Хуляйпол шаарына кирип, Добропилля конушун басып алганын билдирди.

Украинанын президенти Владимир Зеленский буга чейин орус аскердик жетекчилер сөз кылган аймактардагы кырдаалдын чыңалган абалда экенин ырастаган.

Покровск тууралуу сөз сүйлөгөн Зеленский: "Эч ким аларды (аскерлерди) урандылар үчүн өлүүгө мажбурлабайт. Мен ал жердеги аскерлерди, айрыкча командирлерди абалды көзөмөлдөө үчүн колдоймун",- деди. Украина президентинин айтымында, Россия Покровскту көзөмөлдөө менен кагылышууну токтотуу үчүн Украинанын Донбасстан кетиши керектиги тууралуу АКШнын президенти Дональд Трампты "ынандырууга аракет кылат".

Бирок, Зеленский Киевдин аймак тууралуу талабынан баш тарта албай турганын билдирип: "Эл муну түшүнбөйт, адамдар муну түшүнбөйт",- деди.