Түркиянын президенти Режеп Таййип Эрдоган дүйшөмбү күнү Катарга иш сапары менен барып, өткөн жумадагы Израилдин Дохага жасаган соккусунан кийин чакырылган араб-ислам саммитине катышат.
Президент Эрдоганды бул сапарда биринчи айым Эмине Эрдоган, Улуттук чалгындоо уюмунун (MIT) башчысы Ибрахим Калын, президенттин тышкы саясат жана коопсуздук боюнча башкы кеңешчиси Акиф Чагатай Кылыч, коммуникация башкармалыгынын башчысы Бурханеттин Дуран жана Адилеттик жана өнүгүү (АК) партиясынын төрага орун басары Халит Йеребакан коштоп жүрөт.
Дохадагы араб-ислам саммити аймактагы мамлекет башчыларын жана жогорку даражалуу өкүлдөрдү чогултуп жатат.
Бул саммитти Катар өткөн жумада Израилдин Дохадагы ХАМАС лидерлерине жасаган чабуулуна жооп катары чакырган. Чабуулда ХАМАСтын беш мүчөсү жана катарлык коопсуздук кызматкери каза болгон.
Катардын премьер-министри жана тышкы иштер министри Шейх Мохаммед бин Абдулрахман Аль Тани жекшемби күнкү жыйында: “Эл аралык коомчулук эки жүздүүлүктү токтотуп, Израилди кылган кылмыштары үчүн жазалоо убактысы келди”, - деп билдирди.
Аль Тани ошондой эле: "Бул режим Катар, Ливан, Ирак, Иран жана Йемен сыяктуу көптөгөн ислам өлкөлөрүнө кол салды. Каалаганын жасап жатат, тилекке каршы, Америка Кошмо Штаттары жана Европа өлкөлөрү да бул аракеттерге колдоо көрсөтүүдө”,-деп айтты.
Катар, АКШ жана Египет менен бирге, 2023-жылдын октябрынан бери 65 миңдей палестиналык каза болгон Газа тилкесиндеги согушту токтотуу боюнча сүйлөшүүлөрдө ортомчу болуп келет.
