The Washington Post, ABC News жана Ipsos тарабынан жүргүзүлгөн жаңы сурамжылоо америкалыктардын 59 пайызы Трамптын президенттик кызматты аткаруу үчүн зарыл болгон акыл-эс курчтугуна ээ эмес экенине ишенерин көрсөттү.
Катышуучулардын 55 пайызы болсо Трамптын физикалык саламаттыгы бул кызмат үчүн жетишсиз экенин белгилешти. Өткөн жылы күзүндө жүргүзүлгөн сурамжылоодо Трамптын физикалык абалы жетишсиз деп эсептегендердин көрсөткүчү 45 пайыз болгон.
Өнөкөт болгон саламаттыкты сактоо көйгөйлөрү жана медициналык тандоолор талкууланууда
Келерки айда 80 жашка чыга турган Трамптын ден соолугуна байланыштуу сөздөр тиш дарыгерине баруу менен гана чектелген жок.
Дем алыш күндөрү Флоридага болгон сапары учурунда тартылган сүрөттөрдө Трамптын кызыл ашыктарындагы шишиктер көңүлдөрдү бурду.
Адистер бул абал өткөн жылдын июль айында диагноз коюлган «өнөкөт веноздук жетишсиздиктин» натыйжасында буттарда кандын топтолушунан келип чыкканын белгилешти.
АКШнын президенти Дональд Трамптын медициналык адаттары да сынга кабылды. Президенттин күн сайын 325 миллиграмм аспирин колдонору, мунун дарыгери сунуштаган өлчөмдөн төрт эсе көп экени билдирилди.
Трамп бул тандоосун "канынын коюуланышын каалабаганын" айтуу менен жактады.
Андан тышкары, анын колдорундагы көгала тактар аспиринди жогорку дозада колдонуунун терс таасири экени айтылып, Ак үй буга чейин бул абалды "күч менен кол алышуу" менен байланыштырган.
Сындарга карата «жакшы гендер» менен коргонуу
Дональд Трамп акыл-эс жана физикалык жактан «мыкты» абалда экенин айтууну улантууда. Ак үйдүн мурдагы дарыгери Ронни Жексон аны "акыркы үч президенттин саламаттыгы эң чың адамы" деп атаганын эске салып, Трамп фастфуд жебесе, "200 жыл жашай алат" деген сөздөрдү кайталады.
Бир тараптан Овал кабинеттеги жолугушуулар учурунда көзүн көпкө чейин жумуп отурган видеолоруна токтолгон Трамп, булар жөн гана «көз ирмемдер» болгонун же айрым жыйындар «зериктирме» болгондуктан эс алууну туура көргөнүн айтты. Жылдык медициналык текшерүү мөөнөтүнөн бир айга жакын кечиккен Трамптын кезектеги расмий медициналык отчету кызыгуу менен күтүлүүдө.
