Түркиянын президенти Режеп Таййип Эрдоган Түркия геосаясий чыңалуу күчөп жаткан учурда дүйнөлүк масштабда көбүрөөк көңүлдөрдү бурганын айтып, Анкара тышкы саясатта диалогго артыкчылык берүүнү уланта берерин жана "Террордон арылган Түркия" демилгесин өлкө ичинде чечкиндүү түрдө алга жылдыраарын кошумчалады.
Дүйшөмбү күнү Анкарада өткөрүлгөн кабинет жыйынынан кийин сүйлөгөн сөзүндө Эрдоган, тез өзгөрүп жаткан эл аралык жагдайларга карата Түркиянын позициясына кылдат байкоо салынып жатканын билдирди.
Эрдоган: «Учурда Түркиянын дүйнөлүк деңгээлдеги кадыр-баркы көтөрүлүп жатат. Түркия эмне деп ойлойт, эмне кылат, жаңы жагдайларга карата кайда турат жана кандай кадамдарды жасайт деген суроолорго кылдат байкоо салынууда», - деди.
Эрдогандын билдирүүлөрү аймактык кагылышуулар күчөп, глобалдык кемчиликтер тереңдеген мезгилге туш келди. Анкаранын өзүнүн тышкы саясатында дипломатияга артыкчылык берип кризистердин куралдуу чыр-чатакка айланышына жол бербөөгө аракет кылып жатканын баса белгилеген Эрдоган: "Дүйнөлүк чыңалуу күчөп бараткан мезгилде биз тынчтыкка, диалогго жана сүйлөшүүлөргө артыкчылык берген саясат аркылуу кризистерди куралдуу чыр-чатакка айлана электе чечүүгө аракет кылып жатабыз", - деди.
Түркиянын «кайда болбосун укукту жана адилеттүүлүктү жактай турганын» айткан Эрдоган, өлкөнүн «тайманбастан» өз үнүн көтөргөнүн айтты. Эл аралык жагдайларга карата Түркиянын «бекем, кайраттуу, чынчыл жана принципиалдуу позициясы» бааланып, жакындан байкалып жатканын кошумчалады.
Кеңири кызматташууга басым жасоо
Эрдоган Анкара чыр-чатакты эмес тескерисинче кызматташтыкты кеңейтүүгө умтулуп жатканын баса белгилеп: "Бүгүнкү коогалаңдуу глобалдык системада биздин жалгыз максатыбыз - досторубуздун санын көбөйтүү жана жаңыларын табуу. Биз пикир келишпестиктерден душмандыкты жаратууну көздөбөйбүз" деди.
Түркия башка мамлекеттердин эгемендик укуктарын сыйлаганын айткан Эрдоган, ушундай эле урмат сыйдын Түркиянын өзүнүн "укуктарына" да көрсөтүлүшүн күткөнүн билдирип, Анкара кеңири кызматташууну улантуу менен улуттук кызыкчылыктарын чечкиндүү түрдө жактай берерин билдирди.
«Террордон арылган Түркия» процесси
Эрдоган өкмөттүн терроризмди биротоло жок кылуу аракеттерине да токтолуп, коомчулукта "Террордон арылган Түркия" демилгеси катары белгилүү болгон процесске көңүл бурду.
Президент: "Шейиттердин үй-бүлөлөрү жана улутубуз менен биргеликте терроризмди биротоло жок кылуу үчүн жүргүзүп жаткан процессти колдойбуз. Терроризмден пайда көргүсү келгендерге карабастан, процесс өз максатына карай чечкиндүү түрдө илерилеп жатат", - деди.
